UX starvsfólk til Talgildu Føroyar

Ynskir tú at gerast partur av Føroya størstu KT verkætlan?

Gjaldstovan søkir eftir fólki við servitan innan brúksupplivilsi (UX) til Talgildu Føroyar.

Loysnirnar, ið verða mentar í Talgildu Føroyum, eru ætlaðar øllum borgarum í Føroyum. Talan er um ein breiðan skara av brúkarum við ymiskum tøkniligum førleikum og royndum. Neyðugt er, at atlit verður tikið fyri hesum ymiskleika, so øll kunnu gagnnýta hesar loysnir, og at tær kennast lættar at brúka.

Tí sóknast vit eftir einum dugnaligum UX’ara, ið skal góðskutryggja loysnirnar við innliti í, hvat brúkararnir ynskja og hava tørv á.

Starvsinnihald

Vit bjóða eitt spennandi og avbjóðandi starv, har tú skalt virka sum millumliður millum tænastuveitarar, mennarar og brúkarar. Tú skalt:

  • koma við uppskotum til brúksvinarligar og skynsamar loysnir
  • skipa brúkarabólkar og verkstovur
  • samskipa og luttaka í royndarkoyringum (test) av loysnum saman við brúkarum
  • luttaka í greiningum, ið verða gjørdar saman við tænastuveitarum, t.e. stovnar og fyritøkur, ið skulu hava talgildar loysnir mentar.

Uppgávurnar verða loystar í tøttum samstarvi við mennarum, designábyrgdarum og starvsfólkunum í Talgildu Føroyum.

Tú verður partur av ein sterkum og eldhugaðum toymi, har tú kemur at virka sum verkætlanarstarvsfólk, og har tú hevur ábyrgd av yvirskipaðu leiðini innan brúksupplivilsi í Talgildu Føroyum. Á Gjaldstovuni stremba vit áhaldandi eftir, at karmarnir eru góðir til at gera arbeiðið til fulnar. Vit leggja dent á, at starvsfólk trívast og mennast. Tú fer at starvast í einum nýhugsandi og framfýsnum KT-umhvørvi, saman við dugnaligum og ágrýtnum starvsfeløgum.

Førleikar og útbúgving

Vit ímynda okkum, at tú hevur útbúgving á í minsta lagi bachelor stigi, har UX hevur verið ein týðandi táttur.

Tú skalt hava hollan kunnleika til ástøði, háttalag og standardir innan brúksupplivilsi og -brúksvinsemi (design thinking, WCAG v.m.). Tú skalt hava royndir við amboðum, ið stuðla undir tílíkum tilgongdum (t.d. Adobe XD). Tú skalt hava góð evni at greina krøv og ynski, og duga væl at miðla hesi á lætt skilligan hátt (m.a. við 'user journey mapping').

Tað er ein fyrimunur, um tú hevur verksligar royndir innan fakið, og vit vænta, at tú í minsta lagi hevur praktiskar royndir við hesum frá útbúgving.   

Setanar- og lønarviðurskifti

Talan er um tíðaravmarkað starv fram til árslok 2020. Starvið er fulla tíð.

Løn og setanartreytir eru sambært sáttmála millum Fíggjarmálaráðið og viðkomandi yrkisfelag. Arbeiðsstaður er Gjaldstovan í Albert Hall á Argjum.

Umsókn

Umsókn við prógvum og viðkomandi skjølum skal sendast til starv@talgildu.fo. Umsóknin skal frámerkjast “UX Starvsfólk ”

Umsóknarfreistin er 16. august 2018, kl. 13.00.

Meira kunning um starvið fæst við at venda sær til Nicolai Mohr Balle, verkætlanarstjóra á Talgildu Føroyar, nicolai.balle@gjaldstovan.fo ella á tlf. 792 424

 

 

 

Gjaldstovan

KT stuðlar undir alt arbeiðið á Gjaldstovuni. Vit eru skipað í trý høvuðsøki: Løn & Bókhald Landsins, KT- Landsins og Talgildu Føroyar. Vit eru áleið 60 starvsfólk og húsast í Albert Hall á Argjum.

Talgildu Føroyar

Talgildu Føroyar er verkætlan, sum er skipað á Gjaldstovuni. Endamálið er at seta í verk talgilt undirstøðukervi fyri Føroyar. Tað eru fýra høvuðstættir í Talgildu Føroyum: Samleikin, Tænastuportalurin, Heldin og Grundardátur. 

 

Umsóknarfreist

16. august 2018 kl. 13.00