Fíggjarmálaráðið gjørt avtalu um Talgildu Føroyar við samstarvsfelagar
4. apríl 2017 undirskrivaði Fíggjarmálaráðið samstarvsavtalu við 16 fyritøkur og feløg.
Ítøkiliga merkir avtalan, at samstarvsfelagarnir hava ávirkan á verkætlanina og eru við at fíggja hana. Samstarvsfelagarnir fíggja verkætlanina við samanløgdum 16,7 mio. Kr. Í tíðarskeiðinum 2017-2020. Harumframt hava føroysku peningastovnarnir sett 9 mio. kr. av til íløgur og 6 mio. kr. til rakstur í verkætlanini.
Samstarvsfelagarnir hava eitt umboð í stýrisbólkinum hjá Talgildu Føroyum, og hava á tann hátt beinleiðis ávirkan á arbeiðið í verkætlanini.
Talgildu Føroyar fevnir um bæði stovnar, fyritøkur og allar føroyingar, og tí er tað umráðandi at fáa so nógvar partar við sum gjørligt, sum fáa ávirkan á verkætlanina. Soleiðis kann Talgildu Føroyar á besta hátt nøkta talgilda tørvin hjá borgarum, vinnulívi og mynduleikum.
Tá ið samstarvsavtalurnar vóru undirskrivaðar 4. Apríl 2017 segði Kristina Háfoss, landsstýriskvinna í fígjarmálum: “Vit ynskja, at menningin av Talgildu Føroyum verður kjølfest breitt í føroyska samfelagnum, soleiðis at vit fáa loysnir, ið skapa so stóra framgongd sum møguligt fyri føroyingar, vinnu og alt samfelagið. Eg eri tí ómetaliga fegin um, at vit í dag hava gjørt samstarvsavtalur við eina røð av fyritøkum og feløgum, ið vilja verða partar av hesi stórfingnu verkætlan - ein verkætlan, ið fer at flyta Føroyar munandi framá við nýggjum og betri tænastum, størri kappingarføri og einum lættari gerandisdegi fyri føroyingar”
Samstarvsfelagarnir eru
SEV
IRF
Føroya Tele
Vodafone
Atlantic Airways
Eystur- og Sandoyartunlar
Vága Floghavn
ALS og Trygdargrunnurin
Effo
Magn
Betri Trygging
Trygd
Nordik Pensjón
Lív
Betri Pensjón
Felagið Peningastovnar vegna BankNordik, Betri Banka, Norðoya Sparikassa og Suðuroyar Sparikassa.